آنابيل وروح الشيطان

الدومية آنابيل وروح الشيطان

الدمية آنابيل وروح الشيطان

حكاية الليلة دي حصلت هنا في مكان علي بعد ساعة من بيتي في ولاية كينيتيكت بالولايات المتحدة الأمريكية جاهزين؟؟

يالا بينا. .

تحذير: "الحكاية فيها تفاصيل مخيفة وكلام عن عالم السحر والأرواح وممكن تتعب نفسية بعضكم ، فاللي مش هيقدر وقلبه مبيتحملش القصص المرعبة بلاش يكمل "

لكن حبايب قلبي ال Heartless  اللي مبيخافوش وبقوا مدمنين أدرينالين , يجيبوا كوباية اللمون بالنعناع علشان يهدوا أعصابهم ويجوا أحكيلهم حكاية روح آنابيل الشيطانية . .

الساعة 1 بعد نص الليل وفجأة وانت نايم حسيت بالعطش فصحيت من النوم علشان تروح تشرب من التلاجة ، خرجت من غرفتك . .

الدنيا ضلمة . .

بس في أضاءه بسيطة جدا جاية من لمبة صغيرة يدوب تقدر تشوف اللي حواليك. .

وانت في طريقك للمطبخ تحس ان في حركة وراك . .

بتبص متلاقيش حاجة غريبة ، كل حاجه في مكانها ، التلفزيون والمكتبه والكتب والصور اللي علي الجدران والترابيزة الصغيرة اللي عليها عروسة اختك الصغيرة . .

بعد ما اطمنت ان مفيش حاجه غريبة وكل حاجه في مكانها والسكون والصمت بيحوطك من كل مكان ، بتكمل طريقك للمطبخ . .

لكن فجأة. .

بتشوف ضل حاجه جنبك بيتحرك . .

بترجع تبص وراك فاتتصدم لما تشوف عروسة اختك الصغيرة واقفة قدامك ومرسوم علي وشها ابتسامة مرعبة . .

  

الاحساس اللي انت حسيتة دلوقتي وانت بتقرأ أكيد أقل بكتير من إحساس أبطال الحكاية الحقيقية بتاعتنا النهاردة بعد اللي حصلهم مع الدمية المسكونة اللي كانت بتتحرك بليل وهما نايمين ، وبتتحرك لوحدها في البيت هنا وهناك و تأذي اللي يزورهم لو مش عاجبها من أصحابهم وأقاربك ، لو حسوا ناحيتها بالكراهية والغضب ، فهي بتحس بهم ومش هترحمهم ،  أنابيل بتحس باللي بيكرهها واللي عايز يأذيها ، تقدر تأذيهم بكل سهولة بس مش هتعمل كدا إلا اذا اتحدوها ، وقتها هتأذيهم منغير تردد . .

النهاردة هحكيلكم قصة الدمية أنابيل الحقيقية ، أشهر دمية مسكونة في العالم . .

طيب خلينا نبدأ القصة من البداية. .

لو كنت من الناس اللي بتحب افلام الرعب يبقي اكيد شوفت فيلم من الأفلام التي كانت بطلتها هي الدمية المسكونة أنابيل ، لكن اللي انت متعرفهوش هو أن الدمية آنابيل موجودة فعلا في متحف الزوجين وارن للخوارق ، واللي اشتهر بأن الزوجين اللي بيشتغلوا كوسطاء روحيين جمعوا فيه مجموعة من التذكارات من الأحداث غير العادية والمرعبة اللي شافوها .

وخليني اقولكم ان المتحف ده قريب من بيتي في ولاية كينيتكت ، و كينيتكت مشهوره بالبيوت المسكونه وقصص الارواح الشريرة والبحيرات اللي بيظهر فيها كائنات غريبه بالليل.

وتبدأ قصة الدمية سنة 1970 لما دخلت السيدة ماري محل لبيع الحاجات القديمة ، فشافت دمية مستعملة على رف من رفوف المحل ، وقررت تشتريها لبنتها الجميلة دونا اللي بتدرس تمريض . .

ولما رجعت الأم للبيت وقدمت الهدية لبنتها ، ودونا فرحت جدا بهدية مامتها وخدتها معها الشقة اللي ساكنه فيها مع زميلتها إنجي.

دونا حطت الدمية جنب السرير اللي بتنام عليه وكانت فرحانة بيها  . . لكن دونا لاحظت حاجة غريبة اوي ، لاحظت أن الدمية بتتحرك  بالليل لوحدها ، كانت حركاتها  بسيطة جدا , أوقات بتغير مكان راسها مثلا  أو ايديها أو رجلها , دونا مهتمتش أوي بالموضوع وقالت لنفسها ده أكيد وهم ومتهيألي . .

الموضوع بدأ يتغير وذاد الأمر سوء مع الوقت ، فكانت دونا بتخرج وتسيب الدمية قاعدة مكانها جنب السرير ، لكن كانت لما بترجع بالليل كانت بتلاقيها فوق السرير , أو على الأرض ، كانت بتسأل أنجي صاحبتها في السكن هل هي اللي حركتها ، لكن أنجي كانت بتقول انها مجتش جنبها ولا حركتها ، الموضوع بدأ يزيد فبعد فترة كانت الدمية بتمشي لوحدها ،فلما كانت دونا بترجع للشقة كانت بتلاقي الدمية في غرفة تانية  ، فكانت بتسيبها في غرفتها في الصباح ، لكن لما بترجع بالليل  تلاقيها فوق سرير انجي في الغرفة التانية  ، والغريب هو ظهور قصاصات ورقية  صغيرة في كل مكان من الشقة ، مكتوب عليها كلمة واحدة . .

” انقذونا “

مكتوبة بخط  طفل صغير على ورق غريب مكنتش البنتين بيستخدموه أصلا ، وفي اليوم ده رجعت دونا ، تعبانة من برا فلقت الدمية نايمة فوق السرير وعلى إيدها بقعة دم , والغريب أن الدم كان خارج من جسم الدمية نفسها . .

الدمية بتنزف دم زي البشر . .

لما دونا شافت المنظر ده خافت وندهت علي أنجي من الغرفة التانية ، فلما أنجي جت وشافت بقعة الدم فلمستها علشان تشوف ده أيه ، فأتصدمت لما حست بحرارة الدم وملمسه . .

ده دم بشري وخارج من الدمية نفسها ، البنتين كانوا مصدومين ونبضات قلوبهم بتتسابق من كتر السرعة ، و قررت البنتين بأن الموضوع بقي خطير ولازم يتخلصوا من الدمية لكن خافوا لو عملوا كدا يحصلهم مشاكل فقرروا أنهم يطلبوا مساعدة وسيطة روحية بتفهم في الأمور الغريبة والمخيفة دي .

وفعلا طلبوا وسيطة روحانية ولما جت وسمعت من البنتين كل حاجة عن الدمية المرعبة ، قالتلهم بأنه لابد من عمل جلسة لتحضير الأرواح ,  لمعرفة مين الروح اللي ساكنة في الدمية ووعايزة منهم أية . .

والبنتين عملوا زي ما الوسيطة قالتلهم واقاموا الجلسة وقالت الوسيطة أن  الشقة مسكونة بروح طفلة صغيرة أسمها (انابيل هيجنز) كانت عايشة من سنين طويلة جدا في زمن بعيد ، وماتت مقتولة  ودفنت اسفل البناية اللي فيها الشقة  ، وقالت الوسيطة أن روح الطفلة وحيدة ومحتاجة الحب والحنان , وأنها أتعلقت بدونا وانجي وحبتهم ، وعايزة تفضل معاهم ، وبعد تفكير وتردد وافقت البنتين أن الروح تفضل معاهم في الشقة. .

كان في صديق للبنتين اسمه لو , وكان لو بيكره الدمية من أول يوم شافها فيه ومش بيرتحلها خالص ، ونصح البنتين في أحد المرات أنهم لازم يتخلصوا منها , لكن البنتين مهتموش بكلامة .

وفي يوم من الأيام ،  الصديق "لو" راحلهم وكانوا سهرانين بيلعبوا وكانوا مبسوطين وبعد ما الوقت أتأخر قرر يبات عندهم فنام علي كنبة في الصالة ، وفي وقت متأخر صحي "لو" فجأة , في الضلمة والصمت ، حس "لو" بأن في شخص ما قريب منه , حاول انه يشوف مين الشخص ده ، لكنه مقدرش يحرك جسمة , وحس أنه أتصاب بالشلل ، حاول أنه يصرخ لكنه أتصدم أكتر لما الصرخات رفضت الخروج من فمه ، حاول يلف علشان يشوف أي شيء ، لكنه مشافش أي حد ، وفي اللحظة دي بص لتحت . .

وكانت المفاجأة المرعبة اللي خلت قلبة كان هيخرج من جسمه لأ ده مش هيخرج من جسمة بس ده حس أن قلبه هيقف من الرعب . .

كانت الدمية انابيل عند رجله وبتبصله بحقد وغل رهيب , و بدأت تزحف فوق جسمة وهو مش قادر يتحرك لحد ما وصلت لرقبته ، وبدأت تخنقه لحد ما غاب عن الوعي من شدة فزعه. .

الصبح ، قال "لو" للبنتين علي كل اللي حصل لكن البنتين مصدقوش كلامه ، فقالهم بأنه حاسس أن الدمية بتكرهه علشان طلب منهم يتخلصوا منها ، البنتين ضحكوا وفضلوا يسخروا منه وقالت دونا بأنه مجرد كابوس . .

وتاني يوم كانت الساعة 1 الظهر و كان "لو" قاعد مع انجي بيشوفوا خرائط علشان كانوا عايزين يعملوا جولة على رجليهم في المدينة ، وفجأة سمعوا صوت عالي جاي من غرفة دونا ، لكن . .

غرفة دونا كانت فاضية ، لأنها خرجت الصبح , فقام "لو" علشان يشوف أيه مصدر الصوت ده ، ودخل غرفة دونا وكانت فعلا الغرفة فاضية , حس "لو" بأن في شخص واقف وراه ، فلف وشه بسرعه في فزع ومكنش في أي حد. .

غير حاجة واحدة. .

الدمية انابيل. .

اللي كانت قاعدة علي الترابيزه .

فضل "لو" باصص للدمية في رعب وفزع ولما أتاكد انها مبتتحركش رجع يشوف شبابيك الغرفة يمكن تكون هي سبب الصوت اللي سمعه ، لكن ، رجعلة الإحساس تاني بأن في حد وراه بيراقبه , لكن قبل ما يلف ويشوف مين المرة دي . . حس بأيد خفية بتمسكه من الخلف وبتوقعه علي الأرض بقوة ، صرخ بفزع ، فجريت  انجي للغرفة  ، وشافته وهو مرمي علي الأرض ومكنش في حد في الغرفة غيره

أنجي وهي لسه هتسأل "لو" عن أيه اللي وقعه علي الإض وليه صرخ برعب كدا شافت حاجة غريبة. .

شافت على قميصه بقعة دم . .

قام من  علي الأرض وقلع قميصه , وكان في سبع جروح عميقة على صدره زي ماتكون خربشة أظافر , وكانت بتؤلمه جدا وبتحرقه، لكن الغريب أن الجروح دي اختفت بعد كام ساعة .

بعد اللي حصل مع "لو" بدأت البنات  تشك  في كلام الوسيطة الروحانية , ومبقوش مصدقين بأن الروح اللي في الدمية دي روح طفلة بريئة . .

أزاي روح طفلة ممكن تعمل كل الشر ده , فراحوا للكنيسة وشرحت دونا للقس هوجان القصة كلها من البداية و بالتفصيل , فشك القس هو كمان في أن الروح اللي في الدمية تكون روح طفلة طيبة ، وأتصل برجل دين أعلى منه مرتبة هو الأب كوك , واللي أتصل بصديقه إد وارن وهو عنده خبره في الأمور دي وطلب منه يساعده في القضية .

بعد كام يوم زار إد وارن وزوجته ، شقة دونا وأنجي وسمعوا القصة كاملة منهم , وعرفوا الحقيقية . .

الدمية فعلا مكنتش مسكونة بروح طفلة صغيرة زي ما قالتلهم الوسيطة , لكن اللي ساكن الدمية أنابيل هو. .

شيطان. .

أيوة . . جني من الشياطين هو اللي ساكن الدمية المرعبة ومسيطر عليها . .

الجني ساكن أنابيل كوسيلة للوصول لغايته , وكانت غايته هي جسد بشري تقدر تنتقله وتلبسه ، وكان جني الدمية بقي قوي وقريب جدا من الهدف بتاعه وهو جسد اي بنت منهم ، فلو كانوا أتأخروا شوية في طلب المساعدة  من الزوجان وارن كان ممكن فعلا يلبس جسد أي حد منهم أو كان أذاهم وقتل كل اللي في الشقة.

الزوجان وارن بدأوا إجراء طقوس لطرد الشياطين من الدمية أنابيل ، بمساعدة الأب كوك ،  وكانت ليلة صعب جدا لان خلال الجلسة كان بيحصل حاجات مرعبة زي تحريك الكتب من علي الترابيزة قدام عيونهم وسماعهم لصوت طفله مخيفة بتقولهم (مش هتقدروا .. مش هتقدروا)

البنتين حصلهم إنهيار عصبي واتنقلوا المستشفي ، الزوجان وارن أخدوا بعدها الدمية لبيتهم ، لأن البنتين قبل ما ينهاروا مكنوش حاسين بالراحة لوجود الدمية في الشقة معاهم وكانوا عيزين يتخلصوا منها ، وكان الزوجان بيعملوا متحف للأشياء الغريبة والمسكونة  في بدروم البيت في ولاية كينيتكت.

لكن الغريب أنهم لما كانوا راجعين من عند البنتين ومعاهم الدمية الملعونة حصلهم أمور مرعبة جدا . .

العربية تعطلت وكانت هتتصدم في الأشجار الضخمه اللي علي جانب الطريق . .

حصل حاجات غريبة من الامور المرعبة والخارقة للطبيعة . .

قدروا يوصلوا البيت بعد حوادث غريبه علي مدار 7 ساعات في طريق الرجوع مع أن الطريق بياخد ساعه واحدة بس . .

كل الأمور دي كانت بتقول أن الجني اللي في الدمية قوي جدا وقدراته مخيفة . .

الزوج حط الدمية في غرفة المكتب ، لكن واضح أن الشيطان قرر اللعب معاهم و بدأت الدمية تتحرك من جديد ، فكانوا يضعوها في غرفة المكتب ويرجعوا يلاقوها فوق السرير في غرفة النوم . .

الدمية بقت أكثر عنفا وشراسة عن الأول .

وفي أحد الأيام زار الزوجين قس شاب وفي نص كلامهم الزوجين فتحوا موضوع الدمية المسكونه ، وطلب يعرف تفاصيل القصة وفعلا حكوا له كل حاجة عن الدمية ، فطلب منهم القس انه يشوف الدميه ، ولما جاب الزوج الدمية أنابيل مد القس أيده في قوة وخد الدمية من الزوج وبعد اكثر من دقيقة من الصمت التام في الغرفة والقس ينظر في عيون الدميه بتحدي ، صرخ القس في وش الدمية أنابيل وهو بيقول بصوت عالي: ايتها الروح الشريرة ، انت لا تستطيعين إيذاء احد . .

وبعدها رمى الدمية بغضب شديد على الأرض. .

في اللحظة دي صاد الصمت والرعب المكان كله وبدأ الزوجان وارن يتوتروا جدا بسبب اللي عمله القس الشاب المتهور . .

ونظر الزوج إد بقلق وتوتر للقس وقاله:

مكنش صح اللي انت عملته ده . .

بدأ التوتر يزحف لقلب القس من طريقه كلام إد له وتحذيرة من عواقب اللي حصل .

مشي القس وساب الزوجين والدمية. .

وبعد كام ساعة تلفون البيت عند إد وزوجته رن ، وهنا الزوجين قلبهم انقبض بدون سبب معلوم ورد إد علي التلفون علشان يظهر علي وشه كل رعب الدنيا لما سمع الخبر اللي جاله من المتصل. .

القس الشاب اتعرض لحادث خطير جدا وكان هيموت ، بعد ماسبهم ومشي ، فرامل عربيته اتعطلت مرة واحدة ، وأصطدم بشجرة على جانب الطريق , لكنه نجا من الموت بأعجوبة  شديدة . .

لكن بعد ما شافوه بعد شهرين كان حالته بقت سيئه جدا ومش عارف يسيطر علي كلامه وعنيه دايما زايغة وكتير اوي بيبص في أماكن معينه في سقف المكان اللي بيكون فيه والمرعب فعلا هو السائل الأسود الغريب اللي بقي ينزل من ودانه الشمال من يوم زيارته لبيت الزوجان وارن ومحدش من الأطباء عارف ايه السبب.

وفي يوم تاني وحادثة غريبة من نوعها ، راح شاب مع صديقته بالليل علشان يشوفوا متحف الزوجين في بدروم البيت أو القبو ,  فنزل إد معاهم وحكالهم قصة الدمية انابيل , الشاب مصدقش وفضل يضحك ويسخر من الدمية وهو بيقول : انتي تقدري تأذي الناس فعلا؟؟ فلو فعلا تقدري ، فيالا أذيني !! أنا بتحداكي أنك تأذيني يا أقبح دمية علي وجة الارض. .

في اللحظة دي نظر إد للشاب بغضب وخوف شديد وطلب منه أنه يمشي هو وصحبته وميرجعش هنا تاني أبدا  وقاله مكنش المفروض تعمل كدا ولا تتحدي شيطان الدمي ، لكن الشاب فضل يضحك علي إد وعلي الدمية ومشي. .

وبعد أيام من الحادثة عرف الزوجان أد بأن الشاب أتعرض لحادث بشع علي أحد جبال كينيتيكت اللي فيها حيوانات البوب كات المتوحشة (عبارة عن قط بري في نفس جسم النمر وفي نفس شراسته وقوته ) ، فبعد زياره المتحف بيوم كان في رحله لطلوع الجبل مع اصحابه وهجم عليهم أربع بوب كات والغريب انهم سابوا كل الشباب وهجموا علي الشاب وبعد نص ساعه من افتراس الحيونات للشاب متبقاش منه غيرقطع عظم وقطع لحم في شكل أشلاء متناثرة علي الأرض   .

وبعد الحادثة البشعة دي  , قرر الزوجان أد انهم يمنعوا الدمية من إيذاء المزيد من الناس والبشر , فقام الزوجين بوضعها جوه صندوق زجاجي  مخصص ومحصن بالتعويذات والتمائم الدينية ، علشان متقدرش انها تأذي حد تاني . .

وهي لسه معروضة في متحفهم لحد النهاردة في قبو المنزل ، ولكن اللغز الغريب هو ليه الجني الشيطاني اللي في الدمية متمسك بأنه يفضل ساكن الدمية المخيفة دي لحد النهادرة ، وليه مسكنش جسد أنسان وليه لحد دلوقتي متعلق بيها بالرغم من إنها جماد ؟؟ وكانت في فرص كتير قدامه للإستيلاء على جسد أي شخص وأنه يعيش بداخله كوعاء ؟؟

هيفضل الموضوع لغز مخيف وهتفضل قصة الدمية أنابيل محيرة لكل العالم ومحدش عارف السبب بالرغم من  الأفلام الكتير اللي بتحكي القصة ، كلكم في أمان وانتوا بتقروا القصة وبينكم وبينها ألاف الكيلومترات . .لما نشوف ايه اللي هيحصل في السنين اللي جاية مع الدمية أنابيل